नयाँ बसपार्कमा दशैँका यात्रुको निःशुल्क स्वास्थ्य परीक्षण

२४ असोज, २०८३

काठमाडौँ । काठमाण्डौ महानगरपालिकाले गोङ्गबुमा रहेको नयाँ बसपार्कमा चाडपर्वमा घर जाने यात्रुलाई लक्षित गरी निःशुल्क स्वास्थ्य परीक्षण शुरू गरेको छ ।

महानगर प्रहरी बल नयाँ बसपार्कका प्रमुख महानगर प्रहरी नायब उपरीक्षक प्रकाश पण्डितले काठमाण्डौ महानगरपालिका स्वास्थ्य सेवा विभागमार्फत चाडपर्वमा घर जाने यात्रुलक्षित गरी निःशुल्क स्वास्थ्य जाँच शुरू गरिएको जानकारी दिनुभयो ।
महानगरले कक्षबाट रक्तचाप र मधुमेह परीक्षण, झाडापखालाको औषधि वितरण गरिरहेको उहाँको भनाइ छ । यो सेवा दशैँभरि सञ्चालन हुने महानगर कार्यालयले जनाएको छ । नयाँ बसपार्कमा हुने भिडभाड नियन्त्रणका लागि महानगर प्रहरीसमेत परिचालन गरिएको छ ।

नयाँ बसपार्क सञ्चालन गरेको ल्होत्से बहुउद्देश्यीय प्रालिका मानव संशाधन प्रमुख पङ्कज मल्लका अनुसार अरू समयमा हरेक दिन दिन पाँचदेखि ६ हजार यात्रु नयाँ बसपार्क हुँदै काठमाण्डौबाट बाहिर जाने गरेकामा अहिले त्यो सङ्ख्या तेब्बरसम्म पुगेको छ ।